El falò de Sant'Antoni. Alessandro Peducci

El falò de Sant'Antoni.

Poesia di Alessandro Peducci.

Vimercate (MB) - Il falò di Sant' Antonio.

Sant'Antoni sant'Antoni!
Te see rivaa ' lappuntament;
anca s'el frecc l'è da demoni

Te see chì con l'alegria
d'on giovinòtt de desdòtt'ann;
g'hè minga frecc, g'hè minga malànn
che pò frenà l'euforia

d'ona sira come questa.
La gesett'iluminada
tuta quanta la contrada
l'è vestida da la festa.

G'hè la banda che la sona
'nà sinfonia in "fa" màgior;
g'hè la tosa del dotor
sul pogioeu che la limona

col giovinòtt de l'aucàtt
che le propi lì per lee;
intant l'doeugia ..., al cor al bàtt.

Per la contrada l'è on via vai
de gent che va per divosiòn
a dì on "Pater" on' orasion:
(Se sà de guai né manca mai

in da stò mond inscì baloss;)
e Sant'Antoni che l'è 'n ciel
al po' anca per doo candel
interced per nun e fà quej còss

Mi sera là in sul canton
arent al banchètt di tortej
che colorii fragrant e bej
saòtavan foeu dal calderòn.

Quand tutt'an bòtt g'hè 'n sara sara
In la contrada giò in font,
là nel Molgora sott'al pont
'na fiamada la risciàra

ona niada de bagaj
che gir'intorna al gran foeugh
che l'è contenta de stò gioeuch:
e, c'hè nient che pò fermai.

La vampa de la fiamada
la và sù a volt'on tòch
la ris'ciàra anca san Ròch
pituraa sù la faciada.

Tutt stì bagaj con tant'impègn
hin lì intorn'a stò falò;
g'he on quei vùn che ancamò
al porta carta, paja, legn

per slungà là la fiamada.
Ma piàn piàn al perd la forsa,
e, dopo on poo... al se smorsa
ma g'hè subit 'na troada.

(Se smorsa mai per i bagaj
al gioeugh de la fantasia).
Adèss al foeugh al salten via
coragiòs comè non maj.

Ma ne la rèsa gh'è anca quèll
ch'è partìss a al sbagl'al pass
e al piomba comè on sass
propi in dal mèss; e vedèll

con che sveltesa al salta
foeura subìt de la brasca;
'me 'n paserìn de la frasca,
al colp de s'ciòpp, al sà ribalta

per schivà la sciopetada.
Adèss l'è tardi de bon propi de bon,
sti bagaj negher mè 'l carbon
baten tucc in ritirada.

E de tutt stò pandemoni
giò in del Molgora gelaa
al sàvii cosè restaa?
Al ricord de sant'Antoni.


Alessandro Peducci
Poesia tratta da " Voltàs indreee - oltre che bel lè necesari" - I Libri de Il Gabbiano.

Altre poesie di A. Peducci già pubblicate in questo blog:
El pont de San Rochh
E' crodà l'ultima foeja.


Post correlato: 
Vimercate 13/18 gennaio, Sagra di S. Antonio.